Al ricovero en du e du quatro i m’à sgnacà co’ l’è stà ora
anche se gavea en man tuti i dì la lavaşuga e la spassaora
I m’à sgnacà en du e du quatro al ricovero chei malcunè
adeso bisognarìa che qualchedun le ciapesse fissi a scarpè

Con tuto quel che ò fato mi par lori
i m’à envià co’ me vegnù fora du dolori
e l’è inutile che me lamenta adesso
che anca el me sarvel l’è mal messo

Ma non l’aarìa propio mai dito che anca mi
aaria fato da ancò a diman sta fine chi
e sì che de sera nasea sempre drita en leto
par non scoltar parole che me manchesse de rispeto

E po’ preparaa sempre da magnar par tuti
parchè ghera sempre da pasturar novi buti
co’ iè dentè grandi e ià messo su la gresta
no ghera pì posto par la vecia ne la sesta

En giorno a Verona i m’à fato firmar ‘na carta longa dal notaio
che a no’ metarme a lesar prima ò fato dal bon en grosso sbaio
e dopo de sgnacarme al ricovero en du e du quatro ià pensà ben
anca se era ancora bona de rastelar mi mi sola tuto el fen

Adesso – i sarà contenti – i g’à ‘na camara nova da doparar
e mi par lori podo nar – quando voio -anca a farme ciavar
Me domando andò sema ormai rivè
se tutti i veci al ricovero iè sgnachè

Alora vorìa che anca i me fioi la me stessa fine en dì i fesse
ghe vegnaria cossì en mente so mama e tute le so caresse