La prima to azion l’è l’alzabandiera
fradelo alpin da la pena nera,

po’, drito in pié, te stè su l’atenti
te passi in rassegna i provvedimenti

che ’l to Comando te inpone de fare
e insieme al to grupo te devi ’ndare.

Alpin de ieri, alpin de ancó
có riva on disastro, te si là inzamó,

par ogni problema, de ogni colore
te òperi a l’onbra del Tricolore;

tra aluvionà e teremotati
te porti aiuto a tuti i sfolati

pronto a inpiantare tende, solerte,
cucine da canpo, brandine, coverte,

mai no te pesa el sacrificio,
laorando sodo, senpre da amico.

Tuta la gente la te vol ben
ti no te pensi se te… convien.

Te si volontario a tuto tondo
riconossùo da mezo mondo;

come le aquile te voli su in çima;
sul to capel, na stela alpina

te porti orgolioso, con ti, sto bel fiore,
ne la fameja te sémeni amore.

La to legenda ne conta l’ardore
che ogni alpino porta in tel core.

E ti te laori matina e de sera,
ne la to mente sta na preghiera

on desiderio ardente e audace
per ci come ti vole la pace.