Mi ve ricordo tuti, tuti quanti
anca se sèra ancora puteleto
e voaltri puteleti en po più grandi
forti come leoni e l’oro en boca.

Avi lassà la casa, la fameia
el nio endove drento ve scaldave
co’ndosso na gran voia de far festa
de canti, de morose e de balere

per vègner su ‘ n montagna e zo ‘ n Val d’Orsa
al fredo, tanta fame e la paura,
la note strova che ve rosegava
sogni e speranse de na vita nova.

Gò ‘n mente i vostri nomi de batalia:
Fetonte,Bufalmaco, Calandrino,
Leone, Pantagruel, Gargantuà,
Oriano, Kim, Popov e Angiolino…

Ve struco nel silensio del me cor
E ve caresso fin soto la pèl
perché m’ avì ensegnà
cossa vol dir combàter,
combàter per cantar la libertà.