“Qua gh’era la cità de Carpanea, ch’el taramoto se l’à sprofondà “; cossì me poro Barba el me disea, passando via in careto par de là.
Carpanea, Carpanea, ghe sito stà? O gera i veci, po’, che i s’iludea?…
Sfoio le storie e lore no’ gh’in sa, gnanca me Barba, proprio, lo savea. Ma co’ se ara in vale a tiro oto opur co’ la ” Pavesi ” meio ancora, la gumera te svoltola par soto.
Siabole vece e travi carola’ e statue rote la te pesca fora. No’ gè questi i segnai de la cità?
Co’ torno da in Lodeta, verso sera, toco la Roma che me porta via la vale, a poco, a poco, se fa nera e qua se sveia la me fantasia…
Carpanea, Carpanea!
Soto a ‘sta tera, longo el Misserio e la Lodeta mia, te dormi, o gran cità, la pace vera e mi me sento ‘na malinconia.
Carpanea, Carpanea, cita Romana, ‘desso el to’ camposanto el pare on orto, cresse i racolti come ‘na fumana.
Dormì fradei Romani i vostri soni,che ‘sto sangue latin no’ ve fa torto: pronto al varsoro e al’erta coi canoni!”.