“De sera… de note” di Luciano Celotti

De sera me chièto,
devento più bon,
svanisse le vòie cative,
perdono el Signor.
De sera désmentego
el giorno da pòco finìo
e spéto la nòte.
De nòte camino par strada,
e pianso da solo
parchè tanto nessuno me sente.
El pianto l’é meìo de gnente,
el me fa compagnia,
e mentre camìno me sfogo
lesendo poesia.
Se vérse porte e finestre,
i me siga brute parole
e alora mì sigo ancora più forte:
– No’ ghé da rabiarse,
i me versi i-è groste de pan
che màstego a pian
parché rento ghe trovo de tuto:
le rabie, i pianti, i dolori,
e tuti i malani che ò avùo da la sorte. –
De sera, ancora sul presto,
disegno un mondo dai mile colori:
de nòte, pian pianìn lo scancèlo
parchè tanto doman,
sorà dai boiori,
nasserà ‘n altro giorno
piassé péso de questo.

0
  Articoli Correlati
  • No related posts found.