Ma ancò, sa ghèto?
Te vedo straco, scoraià,
più tristo…
Dài, vien qua, stèndete
sul lèto, sera i oci e pensa
d’essar n’altra olta buteleto.
Te farà ben, te vedarè…
Ma tì, sa fèto?
Te piansi? Ma sito mato?
Ormai te ghè i to ani,
e daghe ‘n taio a sti malani!
Ma cosa uto far, dime?
El mondo no l’è fato
par ci pianse,
la vita l’è ‘na farsa,
scoltame da amìgo:
t’è tocà n’anguria smarsa,
e alora?
Dèsso te sì massa inviperìo,
dai, vien qua, stèndete sul lèto,
sera i oci e pensa d’essar
n’altra olta buteleto!
El te sponsa sto silensio,
te par mia? Ma se te scolti
mìle voci le te parla
sconte ne l’ombrìa:
un gril… ‘na rana…
un bisso…’na sigàla…
n’ ala che se move…
senti, scolta, dèsso piove
e le gosse che le bate su le fòie
le te canta par tì solo,
‘na canson e ‘na poesia!
Dài, sta su, fame contento:
scolta, senti ‘sta voce
che te ciama,
senti quel che la te dìse…
Te ricordito? Ghèto in mente?

“… quante corse là nei campi,
sòto un sol che profumava:
viole, more, niai, sirese,
graspi d’ua, ombria de sese!
Sighi, urli, barufòni par ‘na bala
sbusa e fiapa, braghe curte
e gran sgrafoni sui zenoci
pele e ossi, e de colpo ‘na ridata…
Dio Signor, el cor strangossa
al pensier de quela cesa
dove quando vegnea sera,
sensa gnanca versar bòca,
l’era tuta ‘na preghiera…”

Te ricordito? Ghèto in mente?
Ma tì, sa feto?
Ancora a barufar co’i to pensieri?
Ma lassa nar, tira de longo,
e pensa invesse a quando
ne parèa d’averghe tuto
e no g’avèimo gnente,
ma s’èrimo contenti
de quel che se g’avèa.
E alòra ridi, ‘na òlta almanco,
el buteleto che te eri,
l’è qua sentà al to fianco.
Brao, e dèsso dormi,
fate un bel sòno,
parchè doman, sto buteleto,
el tornarà a essar
n’altra òlta… omo!