Avìo visto el Cristo de Leopoli
mentre i lo portava via
par scondarlo in un buso cissà dove?
L’avìo sentìo cosa el sigava?
– No! – l’urlava al mondo intier – No!
Lasseme qua, inciodà su la me Croce.
Serve el me sangue, le me piaghe
ne la carne, le me spine in fronte.
Lassème qua, ve digo,
dove la gente la pol catarme,
la pol pregar sensa paura.
“Vegnì, omeni, sensa un domàn,
ma fioi de Dio,
e che pensì che no’ l ghè più
parchè al so posto ghe n’è ‘n altro
ch’el se crede d’essar come Lu.
Arente a mì, done, co’ le vostre
tete mole, sùte e fiape,
sensa un gossìn de late
da far ciuciàr a le creature
za morte prima d’essar nate.
Vegnì, omeni,
che i v’à brusà i polmoni
contandove la bala
ch’el cemento-amianto
l’è meio de la penicillina
e parfìn de l’oio santo.
Vissìn a mì, bocia, sfrutà e le cantine
a laoràr par far balòni
da zugàr ne le partìe
de la ‘Copa dei Campioni’.
Da mì, butele,
violentà ai giardini in pieno giorno,
da quatro malcunà in cerca de laòro.”
Così l’urlava el Cristo, così el sigava.
Volìo saer le so ultime parole
prima che i lo scondesse in un sudario?
“E basta con ste guere,
con sto vissio de far ‘bum’
par far vèdar ci è più forte,
sempre pronti a far l’amor
lengua in boca co’ la Morte!”
…
Ma tanto, nessun i lo scoltava.