Ò calpestà le dune a monteselo
vestìa de bianco, in còtole delini
viajando a pian in gropa de on camelo
de palme, dromedari e beduini.

Par ti ò sfidà la sé tra le tenpeste
de sabia, venti e foghi de l’inferno,
sognando de catar longo le péste
la strada de la vita in senpiterno.

Ò traversà anca i mari de la tera
in longo e in largo par zercarte Ti,
ma l’era senpre tuta na chimera
parché ghea massa scuro intorno a mi.

E dopo tanti afani, a l’inproviso,
a T’ò catà so ’l monte de la morte
picà sora na crose, el corpo sliso,
a brazzi verti a perdonar la sorte

che l’omo T’à petà nel so delirio
de cativeria e sentimento storto.
Ma eco che dal legno del martirio
ancó risplende on fiore e Ti, Risorto.