Dedicata a Giuseppe Corso
Vittima veronese di Marcinelle
Far memoria…
La memoria. Se sà,
l’è la speransa dela storia!
Speransa pàr el doman!
Vorìa fàr ciapàr amor
a ste parole
a tanti zovinoti sui vintani
che vive qua e pàr altri
che vien da più lontan…
Far memoria de tanti ani fa
de na storia trista de migranti
che a Marcinelle in Belgio
un oto agosto del 56
g’à trovà morte orenda
in ‘na miniera…
262 iè morti
136 iera taliani
i più vegnea
dale tere del sud,
pitoche e grame
ma gh’era anca
veneti e furlani
e tuti nela miseria
se sentìa taliani…
Uno el vegnea da qua
Giuseppe Corso, Bepin
Nato a San Felice,
vivea ala Sorte
nel quartier del Ceo…
E ben fu la so dura sorte,
fadigàr pàr un toco de pan,
e bìnar su quatro palanche
da mandàr a casa
a mama Marcella
pàr fàr cressar ben
i so fradei più picinini…
Fàr memoria…
Ricordar sta gente
e sti fati lontani
pàr far saver
che ghemo tribulà
anca noialtri..
E adesso che ‘n sten ben
iutemo come se pol
ci ne domanda un laoro
e na bona siera
pàr poder campàr…
Grassie a tuti quanti
che fasì memoria
Grassie siora Rita,
e neodi…
Giuliana, Giuliano e Marialuisa
E ci da san Felice al Ceo
vol far memoria
de Giuseppe Corso,
Bepin…
Memoria parché
i zovani veronesi de doman
i sapia soridàr e dar na man
a ci vegnarà spaiso a Verona
migrante, da lontan…
MAG
2021