G’ò da dir che quando son morto
non me ne son gnanca encorto
me parea da stofegarme quela sì
ma l’è capità- come se dir – en pressia cossì
che ala fine avarìa dito gnanca mal
se esse podù ancora vedar la me bela Val

Envesse s’era morto stechìo
e non podea pì tornar endrio
dal leto g’ò visto però na mota de gente girar par casa
tanti che i ricordaa solo d’aver veduo a facia rasa
adeso però ghe despiasea dal bon che fusse morto
eralo mia meio che i vegnesse a catarme co’ nasea tuto storto?

Ma come iè ne ia tuti i me parenti streti
g’ò visto la sposa de me fiol sercar en pressia in te i casseti
e la mattina bon’ora anca me sorele una a la olta rumar tra i calseti
le stasea atente che nissun vedesse endo le metea le mane
forsi par no spartir, se iesse catà, schei, anei o colane

Po’ el prete a messa l’à butà lì quatro parole
mentre quei fora da cesa ridendo i se contaa le fole
Na bela busa i stradini del comune i mà nansià
parchè stesse oltà comodo anca dal de là

Ma mi ve digo che no ghè son mai nà ne la busa
e non stasì a far adesso par piaser chela musa
parchè mi– en verità – giro ancora par el me paese
a controlar ben a una a una case, stradele e sese

Ma non disighelo a nissun che son de chi ancora
Senò i ve siga de sicuro a drio “mati, nasì en malora!”
e mi cossì vardando l’aqua de l’Adese ridarò contento
sentendove smorsegar sò qualche porco o sacramento!