Go qua davanti, come na preghiera
la casa vecia ’ndo’ che stava i noni:
d’oro el pajaro, la porta za in onbrìa
pa ’l sol che taca a nare in catinora.

Su la seraja ghè ’l gelsomin fiorìo
che spande in volta odor del so respiro
missià col sóno de na canpanela
che intona lenta l’Ave de la note.

Me fermo a lézar sta fotografìa:
ozze confuse a l’ora de polenta…
parlari s-ceti, gesti de fameja;
na dona se sbotona la bustina
a incoconar de late el fantolin,
tacà al casson ’ndo’ ponsa la farina.

Me sento intorno insieme co la sera
anca el profumo de la vita mia
spanìa nel tenpo, drento ne sta casa
quan’ verdi i era i sogni da butina
e me conpagna na malinconia
supà de gialo del gelsomin fiorìo
che l’incornisa l’ora de ’ndar via.