Par i so şedese ani me sorela
l’avea domandà ’na roba propio bela,
no en bracialeto o na colanina come regal
ma ‘na roba che, anca mi, ò dito niente mal

La Vespa sentovintisinque pi ics la volea
anca se, par via de schei, non se podea
ma l’à seità così tanto par averghe la motoreta
che me ‘apà la scomensià a nar ia tuti i dì en oreta
Quando la sera el tornaa el parea straco morto
e me mama a dirghe “par che te abie sapà tuto l’orto”

Alora, tornando ala nostra Vespeta
me sorela la volea ‘na moto che se rispeta’
miga el solito sinquantin
che i gavea tutti quei del Confin

Finamente l’è rivà la Vespa bianca e nera
e me sorela l’era pronta a nar fora la sera
l’avea anca envidà ’na so amiga olandese
che la stasea envese a Cavrin de drio ale sese

Dopo magnà me sorela l’à g’à fato qualche gireto
ridendo, osando e celerando col so novo șugheto
po’ me mama la g’à dito “fago en gireto anca mi?”
e me papà “vuto nar propio da par ti?”.

“E parchè, senti mia bona de guidarla?”
la g’à dito la dona fando segno de rispetarla
“Sta atenta mama” la osà me sorela preocupà
de vederse la motoreta nova sasinà

Me mama la nasèa contenta su e şo par la stradela
e parea che la fusse drio a nar en birocela
e su e şo co la schiena drita sempre con drento la seconda
come se la strada la fusse sempre piassè fonda

G’à sigà drio me me ‘apà
sentendo il motor tuto enbalà
“Meti almanco la marcia più alta”
e ela “vuto proprio che me rebalta?”.

Quando ala fine dala Vespa l’è smontà
ha volù montarghe en sima anca me ‘apà
e me mama “vegno anca mi?”
e lu contento “vuto guidar ancora ti?”

I è montè come du morosi sul sentaron
me mama davanti e subito de drio el paron
me mama l’à messo en prima e l’à celerà
e la Vespa come en caval mato la s’à enpenà
e par el peso de me ’apà l’à sa subito rebaltà
Lu l’è n’à longo tirà nela cuneta
ela la s’à piantà ne la gamba la ponta dela cavaleta

La motoreta rebaltà dopo en po’ la s’à smorsà
e me sorela coi lagrimoni la lengua la s’à smorsegà
s’era roti el fren, el parafango e la maneta
dela so bela e nova motoreta
e edendo che el regal l’era tuto sasinà
se i s’era fati mal no la g’à gnanca dimandà

Adesso non ghè pì né me mama né me ‘apà
ma la motoreta la ghè ancora soto al portego a Sandrà
e quando la edo, vardo sempre la ponta dela cavaleta
e penso a me mama e al buso nela so gambeta