Passà a Borgheto
El bel portegheto…

L’Adese l’è’na dona
Che pian pianela se olta so
Se strussia bona bona
Ma sa la dise mi no’ so

La caressa i campi de vegne
Vardando le trote saltar
Far cossì la ghe tegne
Prima de nar a disnar

La se moe e la se engoba
La se endrissa e la se piega
Dei bacani la varda la roba
Combinandose la messa en piega

Saludà ben Rivalta
E Peri slongandoghe le mane
En du e du quatro le piere la salta
Cuciandose a sugar co’ le rane

Da lontan a Brentin
La ghe manda meso baso
Po’ la riciapa el so camin
E alora mi tristo taso

La endoina Dolsè
E pì en fondo Serain
Cosa che sé
Se volesse en butin?

Anca i Forti dela Ciusa
I le strense enamorè
La fa qualche busa
La vol levarse en piè

Ma Volargne l’è proprio tacà
E là ghè ‘na cesa
Ste robe chi no’ se fa
No’ che gnanca ‘na bela sesa

La vorìa tornar en drio
Prima che le magna Verona
Alora mi ghe crio
Ma se vede sa Parona

Resto lì encantà a vardarla
Engalinà sul me Casteleto
Aspeta che ghe parla
Prima che la veda el leto

No, vardè, l’è sa tardi
No’ ghè santi, no’ la me sente mia
Alora par saludarla dago fogo a quatro raudi
E come en can desmentegà fenisso la me poesia