“L’ULTIMA ME SERA” di Lucia Beltrame Menini

Na vója me sconbate te la testa,
l’è come on gran bresparo che me ruza,
na gioza che tormenta i sentimenti:
i me silenzi inparentà col sòno
i pìngola pinpian
tra bine de pensieri che tontona.

Me piasarìa sentire có vien sera
la vose tanto cara che m’à dito,
on giorno roversàndome qua in tera:
“Butina, sito qua? Ma che fadiga…
catar par ti… la verza pi slusenta!”

Po’ m’ò svejà te ’l brolo de la vita
e ò fato tanta strada là in pontara
par caminare al ciaro
co in boca el fià de primavera.

On vento che vien sù da la canpagna
me rùgola so ’l viso odor de viole.

Me piasarìa contarte, mama cara,
quanto che m’è costà chel gomissiel
de giorni ingatejà col scuro
par no morir de stenti e de fadighe.

Se te savessi quanto sole caldo
me sento indosso anca se qua piove…
’Desso te baso e strenzo so ’l me pèto,
come se fusse l’ùltima me sera.

0
  Articoli Correlati
  • No related posts found.