“Na poesia par la Madona” di Luciano Celotti

Ancò, no’ so parchè,
m’à ciapà la vòia
de scrivàr – pensa tì –
du versi a la Madona:
ma scrivar na roba bèla,
che la sia na mesa via
tra na preghiera e na poesia.
Ma scriva cosa?
Parchè co’ la Madona,
che l’è sì na dona,
ma l’è na dona
deventà Madona,
no te pol mia parlar così,
come la vien la vien
e dir le solite parole
che no le dìse gnanca
quel che te volaressi dìr!
Ghe vol n’idea,
n’ispirassion,
averghe rento ‘n sentimento
che te cava fora
tuta la passiòn.
E alòra via,
a scrivar sta poesia,
a tirar fòra paroloni
che magari i fàssa rima
e i te dàga n’emossiòn.
Ma quando è rivà sera
e ò léto tùta quela tiritera
che avèa butato zo,
me so’ incorto che avèa scrito
soltanto co’ la pena
sensa gnanca ‘n po’ de còr.
Deluso me son dìto:
“L’è qua che te volèa
poeta da ostarìa!
Scrivar a Maria,
che l’è sì na dona,
ma l’è na dona
deventà Madona,
l’è solo presunsiòn:
bastava dìr “n’Ave Maria”
come fa ogni cristian
par dìr tùto a quela Dona
a testa bassa e còr in man!”

0
  Articoli Correlati
  • No related posts found.