(La guerra in Ucraina – 2022)

Tasi poeta, tasi…
No’ l’è più tempo de cantar
e sol, e cel e stèle,
l’è ora de tasèr
e inventarse na preghiera
fata de dolor e de bastième.
Dal cel piove sdinse de velèn,
e su la tera se respira, a sboconà,
el saòr del cemento che va in fumo.
La morte la vola sibilando
sensa na s-cianta de vergogna,
spandendo a piene mane
lagreme e paura,
come un bacàn che semena gramegna.
Ancò è morto Wagner, Verdi, Mozart,
Dante, Leonardo e Caravaggio,
e anca Gesù Cristo rento ne la cuna.
Insoma à vinto l’arte de la guera,
è morta la beltade de un mondo
che l’à perso la memoria.
Sighi, urli, s-ciopi:
“Còri, scapa, trovate na busa,
infognate più in fondo ancora,
abituate a l’inferno!”
Tasi poeta, tasi…
E’morta anca la luna.